Kadam-an sa aton, pamilyar na sa ginatawag nga selfie ukon ang pagkuha sang picture sa kaugalingon gamit ang cellphone.
Sa pagselfie-selfie, ang iban nagapa-cute sa atubang sang camera, nagakadlaw kag may yara man sang maisog nga look ukon fierce.
Santo sa pagtuon sa University of California nga may tig-ulo nga Psychology of Well-Being, dako ang impact sa ikaayong lawas sang pagselfie kun himuon ini sa insakto nga pamaagi.
Sa amo nga research study, gin-assign sang researchers ang grupo sang mga estudyante agud magselfie kada adlaw sa sulod sang tatlo ka semana samtang ginapaminsar ang mga tawo ukon butang nga makapalipay sa ila.
Diri kag ginrekord sang mga researcher ang ila nga mga mood kag natukiban nga mas nagtaas ang kumpyansa kag positibo nga panan-awan sang mga estudyante nga may genuine smile ipaanggid sa mga pilit nga yuhom ukon kadlaw.
Sang ginrekord naman ang response sang mga nakakita sang mga selfie sang mga estudyante, natukiban nga dako ang ‘comforting effect’ sang amo nga mga picture bangud sa positibo nga mga yuhom.
Natukiban man sa pagtuon nga makapasangkad sang mental health kag makahatag sang positive energy ang masami nga pag-selfie apang nagakadapat nga likawan ang mga look nga fierce ukon pagkusmod kag magyuhom sang matuod-tuod.
