Ginapasuni nga ‘selos’ kag ‘love triangle’ ang rason kag motibo sa nagluntad nga shooting incident sa Brgy. Lanag, Sta. Barbara, Iloilo.
Ang biktima amo si Rodito Celis Jr., residente sang Omambog, Sta. Barbara; samtang ang suspek amo si Ronald Susvilla, 45-anyos residente sang Brgy. Dalid, Sta. Barbara.
Ang duha ang ginapahayag nangin ka-relasyon ni Alyas “May-may”.
Sa interview sang Bombo Radyo kay Punong Barangay Francisco Sudaria, iya ginpahayag nga una nga nagreklamo sa iya ang suspek nga may gindala nga lalaki si Alyas May-may sa ila puluy-an apisar nga sila ang may kabataan.
Suno kay Sudaria, ang lalaki nga gindala ni Alyas May-may amo si Rodito Celis Jr. nga amo biktima sa nagluntad nga pagpangluthang.
Ginbuyagyag man sang natungdan nga naka-schedule na sa adlaw sang Dominggo, subong nga semana nga ipa-atubangon sila agud masolbar ang kaso.
Apang, wala naglab-ot sa adlaw sang ila pagsinapol kag na-impito si Ronald kag natirohan ang lalaki nga gindala ni Alyas May-may.
Natukiban man nga ang suspek sa krimen nga si Ronald ang may legal man nga asawa antes nga nag-updanay sila ni Alyas “May-may”.
