𝗟𝗔𝗠𝗕𝗨𝗡𝗔𝗢, 𝗜𝗟𝗢𝗜𝗟𝗢 — Tatlo ka mga anggulo ang ginasundan sang mga otoridad sa paglampos kag pagbuno-patay sa construction worker sa Barangay Poblacion Ilawod, Lambunao, Iloilo.
Ang biktima amo si JP Lego, 30, soltero, construction worker kag residente sang Barangay Bagongbong, Lambunao, Iloilo.
Samtang, ang ginapahayag nga suspek amo si Ronaldo “Alyas Bugoy” Celiz sang Calinog, Iloilo.
Sa interview sang Bombo Radyo kay Police Major Tayona, hepe sang Lambunao Municipal Police Station, iya ginpahayag nga lakip sa mga anggulo sa krimen amo ang hinubog, indi pag-intindihanay kag selos.
Suno kay Tayona, kun indi subong nga adlaw, possible nga bwas ini mapasakaan sang kaso nga murder.
Ginkumpirma man sini nga arestado na ang suspek bangud sa panaysayon kag pagtumod sang witness nga ang ginatumod nga suspek mismo ang nagbuhat sang krimen.
Una na nga ginpanginwala sang suspek nga siya ang ulihi nakaupod sang biktima kag suno sa iya, matapos nila nga mag-inom, naglisensya pa ini nga maglakat bangud may tabuon nga abyan antes paman nga nasapwan-patay.
Nakita naman sa lugar sang krimen ang isa ka dos-por-dos nga gingamit sang suspek sa paglampos sa biktima, samtang ang kutsilyo ang wala makita sang kapulisan.
Nahibaluan nga nag-agum sang patal nga pilas sa tiyan kag kamot ang biktima, kag nasapwan na lamang nga patay kag wala na sang panapton kahapon nga adlaw.
