THAILAND – Gindeklarar na ang semi-lockdown sa Thailand matapos nga amat-amat nga nagnubo ang kaso sang Coronavirus Disease (COVID-19).
Suno kay Bombo International Correspondent Cleo Rose Jondonero, direkta sa Kingdom of Thailand amat-amat naman nga nagbukas ang mga establisyemento komersyal kaangay sang mga salon kag iban pa.
Dugang sang natungdan nagbukas naman ang pinakadako nga ‘weekend market’ sa nasambit nga pungsod nga masami gina dugok sang mga tawo agud mamalaklon.
Ginalauman nga magbalik na sa ‘full service’ ang mga malls sa masunod nga semana apang nagakadapat lang nga tsekyaron nga naga obserbar sang social distancing kag pagsuksok sang mask ang mga costumer.
Ginbuksan naman ang ginakabig ‘sin city’ sa Pattaya, Thailand ang amo ang ‘center of entertainment’ matapos nga gindeklarar nga COVID free ang nasambit nga lugar.
Nangin sentro naman sang pagpakamalaot sang mga pumuluyo ang pagbalik sa normal sa byahe sang sky transit sa Thailand bangud indi malikawan ang pagdinaguso sang mga pasahero nga masakay kag daw kaangay nga mangin imposible ang pag obserbar sang physical distancing.
Nagpagwa man sang bag-o nga mandato ang Ministry of Education sa Thailand may kaangtanan sa liwat nga pagbukas sang klase sa diin may yara na sang duha ka pamaagi agud makatudlo ang mga manunudlo sa ila mga estudyante.
Base sa mandu sang Ministry of Education and duha ka pamaagi, amo ang online classes kag pag-upload sang mga manunudlo sang ila mga leksyon nga mahimo man idonwload sang mga estudyante.
Nahibaluan nga sa subong nagdangat nalang sa 3,004 ang kabilugan nga kaso sang Coronavirus Disease 2019 sa Thailand sa diin 2,787 diri ang naka recover na kag 56 naman ang nagkalamatay.
