ILOILO CITY– Tuman ang kalipay sang isa sa mga semifinalist sa Bombo Music Festival 2019 bangud nadala sa listahan ang iya ginhimo nga ambahanon.
Sa interview sang Bombo Radyo kay Kris Traviña, 34 anyos kag nakatapos sang kurso nga Information Technology, iya ginpahayag nga nalipay siya kag halos indi makapati nga nadala ang iya komposisyon nga sa Pangarap Nalang bilang semifinalist.
Halos duha tubtob tatlo man ka semana suno sa iya antes niya natapos ang komposisyon.
Pahayag ni Traviña nga nakacompose naman siya sang graduation song kag nagacompose man sang ambahanon para sa choir sang simbahan.
Suno kay Traviña ang iya pamilya kag ang iya kaugalingon ang nagserbe inspirasyon agud padayunon niya ang paghimo sang nasambit nga ambahanon.
Magluwas diri suno sa iya ginhimo man niya nga inspirasyon ang naeksperyensyahan nga bullying bangud man sa iya kondisyon nga may yara siya sang apert syndrome.
Sang una suno sa iya mahilig siya sa poetry apang sa ulihi naisipan niya nga magsulat man sang musika.
Magluwas sa paghimo sang ambahanon suno kay Traviña naga-engage man siya sa events organizing.
Nagpasalamat man siya suno sa natungdan sa songwriting workshop nga ginpatigayun sang Bombo Radyo bangud mas nahanas siya kag madamo sang natun-an may kaangtanan sa pagsulat sang mga ambahanon.
