ILOILO CITY- Ginpasiguro sang Sangguniang Panlalawigan Secretariat sang Iloilo Provincial Government nga indi mapiang ang ila opisina kadungan sang pagahiwaton nga Seminar on Work and Life Balance During the Pandemic.
Ini nga aktibidad ang patigayunon umpisa Hunyo 1 tubtob Hunyo 3, 2022 sa isa ka mountain resort sa La Carlota City, Negros Occidental.
Sa interview sang Bombo Radyo kay Atty. Raul Tiosayco, Jr., secretary to the Sanggunian, iya ginpahayag nga ini nga aktibidad ang tuigan na nga ginahiwat sa bisan ano lang nga government offices apang sa ila bahin, temporaryo nga ginsuspend ini bangud sa pandemya.
Suno kay Tiosayco, pagkatapos sang duha ka tuig nga wala ini natigayon, nadesisyonan sang SP Secretariat nga i-resume ang seminar workshop on work and life balance.
Pahayag sang natungdan,sa amo nga seminar, ipakigbahin sa ila sang mga eksperto halin sa Civil Service Commission sa Negros Occidental Office ang mga insights agud nga maghatag tips kun paano i-balanse ang kabuhi kag trabaho.
Nagalaum si Atty. Tiosayco nga mangin produktibo ang mga empleyado nga magatambong sa tatlo ka adlaw nga seminar.
Dugang pa sang natungdan, may yara sang mga empleyado nga mabilin sa opisina sa Iloilo Provincial Capitol agud magbaton sang mga dokumento.
Sa pondo naman, ginpahayag ni. Atty. Tiosayco nga ang gamiton nga kwarta ang halin sa annual budget sang probinsya apang indi lang niya mapat-od kun pila gid ang exact amount.
