ILOILO CITY – Ginsuhestiyon ni Senator Alan Peter Cayetano ang pagtanyag sang reward sa sin-o man nga makabulig sa pagdakop sang mga cybercriminals kasunod sang serye sang pagpang-atake sa government websites.
Sa ginpatigayon nga hearing sang Senate Committee on Science and Technology nga iya ginapamunuan, ginpahayag ni Cayetano nga ang sin-o man nga maka-report may kaangtanan sa hacker ang mahimo nga makakuha sang “P250,000 tubtob P500,000.”
Suno sa senador, may pulos ang paghatag sang reward kun mapunggan sini ang major data breach.
Una nga ginbiktima sang ransomware attack ang state insurer nga PhilHealth nga nagbutang sa alang-alang sa data sang mga users.
Ang Philippine Statistics Authority ang nag-report man sang “data leak” sang nagligad nga semana apang ang data nga nakuha ang limitado lamang.
Sang weekend naman, ang website sang House of Representatives ang gin-hack.
Ginpahayag man sang Department of Information and Communications Technology nga ang systems sang Department of Science and Technology kag sang Philippine National Police ang gin-hack.
Nagapati ang ahensya nga ang mga local hackers ang sa likod sang pinakaulihi nga pagpang-atake.
Ginpahayag dugang ni Cayentano nga mahimo magamit ang confidential funds sa pagpasiguro sang seguridad apang gin-athag niya nga wala niya ginaduso ang pag-allocate sang amo nga pondo sa nasambit nga ahensya.
