Nagapreparar na si Senator Ramon “Bong” Revilla Jr nga magpasaka sang kaso batok sa mga indibidwal nga yara sa likod sang online posts nga ginapatihan sang iya kampo nga rason sa iya kapierdihan sa 2025 midterm elections.
Sa interview sang Bombo Radyo kay Atty. Alfredo Arungayan, Bombo Abogado, iya ginpahayag nga antes paman nga nagpabutyag sang amo nga tikang si Sen. Revilla, tuig 2019, may mga kapareho na nga mga posts nga nagalapta online.
Suno kay Arungayan, ang ginadepensahan diri ni Revilla amo ang kaso sini nga pagpangawat sang pondo sang publiko nga anay na nga na-dismiss sang korte sang 2018.
Gin-athag man sang natungdan nga luyag ni Revilla nga paguwaon nga indi siya makawat.
Ginpahayag naman ni Atty. Raymond Fortun, legal counsel ni Revilla, nga tuyo sang senador nga maproteksyunan ang reputasyon sini kag sang iya pamilya sa gina-alegar nila nga malisyoso nga pagpang-atake sa social media kag iban pa nga digital platforms.
Si Revilla, isa ka beterano nga mamalidha kag anay aktor, napaslawan nga makakuha sang seat sa Senado matapos nga nagtapos sa ika-14 nga pwesto sa bag-o lang natapos nga eleksyon.
