Nag-file sang joint resolution ang Ilonggo Senator kag Senate Minority Leader Franklin Drilon nga nagapangabay nga i-extend ang prangkisa sang ABS-CBN tubtob sa Disyembre 2022.
Sa exclusive interview sang Bombo Radyo kay Senador Drilon, iya ginpahayag nga ginabanta 11,000 ka mga empleyado kag talent ang madulaan sang trabaho sa tion nga indi ma renew ang prangkisa kag masirado ang network.
Suno kay Drilon, pat-od nga magapadulong si Solicitor General Jose Calida sa Korte Suprema agud nga magpangayo sang order nga untaton ang operasyon sang ABS-CBN bangud ma expire na ang prangkisa sang korporasyon sa Marso 30.
Ini matapos nga nagpasaka sang quo warranto petition si Calida sa Korte Suprema batuk sa ABS-CBN.
Mahimo man nga magpangayo sang temporary operations permit ang ABS-CBN sa National Telecommunications Commission apang indi lang mapat-od sang Senador kun bala mahatag man ang ahensya sa broadcast network bangud ang NTC ang kabahin sang executive branch sa idalom sang supervision ni Presidente Rodrigo Duterte.
