ILOILO CITY- Nagbwelta si Senate Minority Leader Franklin Drilon kasunod sang mando ni Presidente Rodrigo Duterte nga imbestigahan ang ginaalegar overpriced nga Iloilo Convention Center kag kun matuod nag ang contractor sini nga Hilmarc’s Construction Company amo man ang contractor sang bag-o nga Senate Building sa Fort Bonifacio Taguig City kag Makati City Hall Building 2.
Sa interview sang Bombo Radyo Iloilo kay Sen. Drilon, iya ginpahayag nga taktika lang ini sang presidente agud nga patalangon ang atensyon sang publiko sa imbestigasyon sa anomalya sa pagbakal sang PS-DBM sang COVID-19 sa supplies sa Pharmally Pharmaceutical Corporation.
Suno kay Drilon, tuman na ka ulihi si Duterte sa balita bangud nga naimbestigahan na sang Senate Blue Ribbon Committee ang nasambit nga isyu kun sa diin personal ini nga nag-atubang sang nagapungko pa siya bilang Senate President.
Suno pa kay Drilon, napamatud-an na sadto pa nga wala sang anomaliya sa pagtukod sang Iloilo Convention Center kag sa pagkamatuod, ang Senate Whistleblower nga si anay Iloilo Provincial Administrator Manuel Mejorada ang naconvict sa kaso nga libel.
Nanindugan naman si Drilon nga indi mag-untat ang Senate Blue Ribbon Committee sa pag-imbestigar sa Pharmally bisan pa nga ginapatalang ni Duterte ang isyu.
