ILOILO CITY – Nagpaathag si Sen. Franklin Drilon kun nga-a wala ini makatambong sa selebrasyon sang Iloilo City sa ika-80 nga Charter Day.
Suno sa senador, wala siya gin-imbitar sang city government sa selebrasyon rason nga wala ini magtambong.
Sang Huwebes sang gab-i lang suno kay Drilon siya ginpahibalo kaangot sa selebrasyon kag bangud may mga nauna na nga commitments, wala siya makatambong.
Apang depensa naman sang Iloilo City Tourism and Development Office (CTDO), madugay na nila gin-imbitar si Drilon para sa selebrasyon sang siyudad.
Ginpahayag sa Bombo Radyo ni CTDO head Junnel Ann Divinagracia nga madugay na sila nagpakig-angot sa personal assistant sang senador apang wala sang kumpirmasyon kun magtambong ini.
Pamatuod suno kay Divinagracia ang bayluhanay nila sang text message sang PA ni Drilon nga wala ginkalimtan ang senador nga imbitaron ang sa okasyon labi na nga isa ini ka Ilonggo.