ILOILO CITY – Wala sang may nakita nga conflict of interest si Senator Imee Marcos sa iya pagpungko bilang chairman sang Senate Committee on Electoral Reform and People’s Participation sa pagpadalagan sang iya utod nga si former Sen. Ferdinand “Bongbong” Marcos Jr. bilang presidente sa May 2022 Elections.
Ini ang sabat sang senador kasunod sang pila ka panawagan nga magbiya siya sa iya chairmanship nga amo ang nagapatigayon sang imbestigasyon sa ginapahayag nga data breach sa system sang automated election system service provider nga Smartmatic.
Suno kay Marcos, wala sang conflict of interest bangud wala man sang kandidato nga gusto nga madaya-an kag gusto sang publiko nga mangin fair kag free ang election.
Dugang pa ni Marcos, ginatungdan lang niya ang iya nga trabaho kag ginahimo ang tanan nga masarangan agud nga matungdan ini.
Pahayag dugang ni Marcos nga ang iban nga myembro sang komitiba ang nagapadalagan man sa 2022 national and local elections.
Ang vice-chair niya amo si Sen. Ping Lacson nga nagapadalagan bilang presidente.
Kabahin man sang komitiba si Senate Pres. Vicente Sotto III nga nagapapili man bilang bise presidente.
Kung madumduman, nagpanawagan ang election watchdog nga Kontra Daya kay Senator Imee Marcos nga buy-an ang Senate Committee on Electoral Reform and People’s Participation bangud sa posible nga “conflict of interest” kag bangud man sang “delicadeza.”
