Gindepensahan ni Senator Kiko Pangilinan ang nangin desisyon ni former Vice President kag subong Naga City Mayor Leni Robredo nga abi-abihun sa ila lugar si Israel Ambassador Dana Kursh.
Ini matapos nakabatun sang kritisismo si Robredo halin sa publiko bangud sa nagapadayun nga tension sa Israel kag sa Palestine kun sa diin ginapahayag nga nagkomiter sang Genocide ukon mass killing ang Israel sa Gaza.
Sa social media post ni Pangilinan, ginpakigbahin sini nga wala naga-buot silingon ang pagbisita sang isa ka opisyal bilang pag-endorso ukon pagsuporta sang Local Government sa mga aktibidad sini.
Suno man sa iya, naintindihan nya gid ang nangin reaksyon sang publiko, ilabi na nga nagtuga sang trauma sa mga Pilipino ang Tokhang era ni former President Rodrigo Duterte kun sa diin madamo ang mga nasapwan na lang nga wala na sang kabuhi.
Pahayag man sang senador, importante nga mahibaluan sang publiko nga may ara sang diplomatic responsibilities ang mga public officials, apang kinahanglan man suno sa iya nga mamintinar sang mga ini ang ila commitment sa human rights, civilian protection, kag accountability sa idalom sang international law.
Nahibaluan nga tubtob subong, wala sa gihapon sang ginpaguwa nga statement si Robredo sa nabatun sini nga mga komento.
