Wala nakaluwas si Sen. Leila De Lima sa mga makahang nga tinaga nga ginbuy-an ni Presidente Rodrigo Duterte kagab-i kadungan sang iya nga Talk to the Nation.
Ini matapos nagpanawagan ang senador sa long-time aide sang Presidente nga si Sen. Christopher “Bong” Go nga untatan ang pag-cover up kay Duterte kag pagpatalang sa publiko sa matuod sini nga kapasidad sa pagdumala sang pungsod.
Nahibaluan nga madamo sang mga pictures nga ginpaguwa si Senador Go sa diin makit-an nga kaupod niya ang presidente, naga golf, nagamotorsiklo kag naga-jogging agud nga ipahibalo sa publiko kun sa diin bala ang presidente bangud isa ini ka semana nga wala makapakita.
Suno kay Duterte, nagakadapat lang nga mapreso si De Lima bangud ginbastos niya ang pungsod matapos ini maangot sa iligal nga droga.
Makapila man ka beses nga ginbuyayaw sang Presidente si De Lima.
Maisog naman nga ginsabat ni De Lima ang paglaslas sa iya sang presidente.
Suno sa senadora, madamo na sang mga Filipino ang namatyan sang mga palangga sa kabuhi apang siya sa gihapon ang ginaproblema sang presidente.
Kun nagtrabaho na lang ang Presidente pahayag niya, wala kuntani sila sang gamu subong.
Dugang pa ni De Lima, nakahibalo ang tanan nga si Duterte mismo ang nagpamatok sadto nga indi pag i-ban ang mga tawo halin sa China nga makasulod sa Pilipinas rason nga naglapta ang virus sa pungsod bangud sa iya gintawag “tuta” sang China.
