ILOILO CITY – Ginkwestiyon ni Senator Risa Hontiveros ang P8.7 billion nga gasto sang National Grid Corporation of the Philippines sa janitorial kag security services humalin sang 2009 tubtob 2022 nga ginbayran sang mga kunsumidor pinaagi sa transmission charge.
Ang transmission charge ukon ang balor sang electricity delivery sa system sang isa ka electric power distribution company ang nagabug-os sang 10.1 percent sang total monthly bill sang mga kunsumidor samtang ang generation charge ukon ang balor sang kuryente nga ginbakal sang mga suppliers ang naga-account sang 55 percent.
Ginkwestiyon ni Hontiveros kun bala, tuman ka damo sang higko nga tinluan rason nga kinahanglan maggasto sang binilyon ka pesos para sa janitorial services.
Apang suno sa iya, ang mga proyekto nga kinahanglan kuntani nga makumpleto base sa ila congressional franchise ang tuman ka atrasado kag ang balor sang kuryente ang nagapabilin nga mataas.
Magluwas pa diri, ginpahayag sang senador nga linibo pa ka mga Filipino households ang wala sa gihapon sang access sang estable nga suplay sang kuryente bangud sang kapaslawan sang power grid system operator nga mag-connect sang ila areas sa main power grid.
Una na nga gin-usisa ni Hontiveros ang kwestiyonable nga gasto sang National Grid Corporation of the Philippines sa ginpatigayon nga budget hearing sang Energy Regulatory Commission kag sang Department of Energy.
Ang NGCP ang 40-percent nga ginapanag-iyahan sang State Grid Corp. sang China samtang ang nabilin nga 60 percent ang ginatunga sang Monte Oro Grid Resources Corp. kag sang Calaca High Power Corp.
