Nagsabtanay sa social media sanday Senator Robin Padilla kag Philippine Coast Guard (PCG) spokesperson for the West Philippine Sea nga si Rear Admiral Jay Tarriela.
Ini kasunod sang pagguwa sang state-backed media nga China Daily sang isa ka AI-generated video nga nagalaragway sa mga Pilipino bilang mga amo.
Antes sini, ginhangkat ni Tarriela si Padilla kag si Senador Alan Peter Cayetano nga magpanawagan sa China nga mangayo sangpublic apology sa mga Pilipino.
Suno sa iya, pareho ini sa ila anay nga pagkondena kag paghingyo nga mangayo sang pasaylo bangud sa paggamit sang caricature ni Chinese President Xi Jinping.
Sa isa ka Facebook post, nagsabat si Padilla kag ginsingganan niya si Tarriela nga amo ang nagpamuno sang kinagamo kag nagahimo sang wartime propaganda.
May kaangtanan naman sa Chinese media, gintuad man ni Padilla nga kaangay man sa gihapon ang panan-awan sang mga white colonizers.
Suno pa kay Padilla parehos man sa gihapon nga kayumanggi ang mga Pilipino, samtang yellow naman ang mga Tsino kag Hapon.
Sa post naman ni Tarriela sa X, nagpahayag si ini nga ang transparency initiative sang PCG indi wartime propaganda.
Suno sa iya, ini isa ka pamaagi agud mabuyagyag ang mga pagpangharas sang China batok sa mga Pilipino nga mangingisda kag sa mga barko sang Philippine Coast Guard kag Bureau of Fisheries and Aquatic Resources (BFAR).
Suno pa sa opisyal, isa ini ka daku nga insulto sa masobra 26 ka milyon nga Pilipino nga nagboto kay Padilla kon batonon nga mga amo ang mga ini.
Dugang niya, bilang isa ka Pilipino, indi gid niya pagbatunon nga amo ang iya lahi kag indi man niya pagbatunon nga amo man ini ang paglantaw sa masunod nga mga henerasyon sang mga Pilipino.
