Pormal nga nagsumiter sang sulat si Senate Minority Leader Tito Sotto kay Senate President Chiz Escudero, agud hingyuon ang pagpatuman sang mandatory random drug testing sa mga empleyado kag opisyal sang Senado.
Ini nga tikang ang ginpatigayon kasunod sang report nga may staff si Senator Robin Padilla nga nadakpan nga naggamit sang marijuana mismo sa sulod sang Senate premises, isa ka isyu nga naghatag sang kahangawa sa integridad kag seguridad sang institusyon.
Suno kay Sotto, sang 2018 pa lang sang siya pa ang nagapungko bilang Senate President, ginapatuman na ang nasambit nga drug testing bilang kabahin sang pagpatuman sang Republic Act 9165 ukon ang Comprehensive Dangerous Drugs Act of 2002.
Gintumod niya nga ang amo nga lihok magaserbe bilang pamaagi agud masiguro nga ang Senado padayon nga mangin drug-free workplace kag modelo sang pagrespeto sa layi.
Una na nga nagpahayag sang suporta sa panawagan ni Sotto sanday Senador Juan Miguel Zubiri kag Senate Majority Leader Joel Villanueva, nga lunsay nagsiling nga handa sila magpaidalom sa drug testing bilang kabahin sang transparency kag integridad sa serbisyo publiko.
Sa subong, wala pa sang opisyal nga sabat si Senate President Escudero sa nasambit nga sulat ni Sotto.
