Nagapanawagan si former Senator Antonio Trillanes sa Independent Commission for Infrastructure (ICI) nga imbestigaran sanday anay presidente Rodrigo Duterte kag Sen. Bong Go sa ginapahayag nga iregularidad sa masobra P6.9 billion nga government projects sa Davao, lakip na ang flood control.
Sa sulat kay ICI Chairperson Justice Andres Reyes Jr., nagsumiter si Trillanes sang kopya sang complaint affidavit nga gin-file niya sa Office of the Ombudsman sang Oktubre 21, nga nag-akusar sa duha sang plunder kag graft.
Suno kay Trillanes, madamo nga kontrata sang gobyerno ang nakuha sang construction firms sang pamilya ni Go lakip ang joint ventures kaupod ang St. Gerrard Construction nga ginapanag-iyahan sang mga Discaya, nga nalakip sa ginaimbestigaran nga flood control projects.
Ginaduso niya nga i-summon sang ICI ang pamilya ni Go kag opisyales sang DPWH agud i-eksplikar ang mga transaksyon kag inspeksyonon ang mga Davao project sites para matuod kun napatuman ang mga proyekto.
