Gin-ako ni Sen. Joel Villanueva nga tuman gid kasakit ang nabatun niya nga mga komento bangud sa mga alegasyon sa iya may kaangtanan sa flood control controversy.
Ini ang ginpakigbahin sang senador sa ika-48 nga anibersaryo sang Jesus Is Lord nga isa ka religious organization nga ginapangunahan sang iya amay nga si CIBAC Party-list Representative Brother Eddie Villanueva.
Suno sa senador, nagtingub ang mga Mafia kag forces of Darkness agud gub-on sya sa publiko.
Apang pahayag man ni Villanueva, wala na sang may makatupong sa sakit nga iya nabatyagan sang naulamid na ang iya pamilya kag ang JIL Church.
Kasunod ini sang ginapahayag korapsyon ukon iregularidad sa mga proyekto sang gobyerno kun sa diin gindalahig ang iya pangalan sang pila ka mga Department of Public Works and Highways (DPWH) officials.
Kabahin sa mga nagpasibangud sa iya amo sanday Former Bulacan first district assistant district engineer Brice Hernandez kag Former Bulacan district engineer Henry Alcantara.
Sang Setyembre 2025, sa pagpanguna anay ni Senator Panfilo Lacson sang Senate Blue Ribbon Committee, ginpakigbahin sini nga nagaguwa sa pila ka mga dokumento nga P600 million halin proposed flood control projects sa Bulacan sa idalom sang 2023 General Appropriations Act ang naangot kay Villanueva.
