ILOILO CITY – Ginpahayag ni Senate Committee on Basic Education chairman Win Gatchalian nga dapat nga ibalik na sa June-to-March ang academic calendar sa mga eskwelahan agud nga ang bakasyon sang mga estudyante ang matuon sa summer.
Ini ang suhestiyon ni Gatchalian matapos ang hospitalization sang mga estudyante sang Gulod National High School-Mamatid Extension sa Cabuyao, Laguna sang nagligad nga semana kun sa diin, ang mga estudyante ang nakitaan sang sintomas sang dehydration kag heat exhaustion matapos nagpasakup sa surprise fire drill.
Nag-apelar man ini sa mga eskwelahan nga likawan ang mga aktibidad nga makahatag sang peligro sa mga estudyante subong nga summer season.
Nahibaluan nga bangud sang ginpatuman nga lockdown sang Coronavirus disease 2019 pandemic, nagsirado ang mga eskwelahan nga nagresulta sa adjustment sang academic calendar nga nagbukas sang Agosto sang nagligad nga tuig kag magatakup sa Hulyo.
Suno kay Gatchalian, dapat nga magbalik na sa normal ang mga butang subong nga naga-recover na ang pungsod nagikan sa pandemya.
