Nagpabutyag sang pagkadismaya ang Senado sa mahinay nga dalagan sang ginaduso nga Panay-Guimaras Bridge.
Sa budget deliberations sang National Economic and Development Authority (NEDA), maprangka nga ginpahayag ni Senate Minority Leader Franklin Drilon kay Socioeconomic Planning Secreatry Karl Chua nga dismayado ini nga wala maayo ginhatagan sang igtalupangod ang nasambit nga proyekto.
Ini bangud gintu-ad ni Chua sa myembro sang Senate Finance Committee nga ang engineering design sang proyekto ang maga-umpisa pa sa Oktubre 2022 samtang ang construction ang ginalauman naman nga ma-umpisa sa 2025 kag 2030 naman ini matapos.
Depensa ni Chua, Korea na subong ang magapondo sang taytay kag indi na ang China sa diin nagabalor ini sang P187 billion.
Suno pa sa iya, nagasugilanon na ang Department of Public Works and Highways (DPWH) kag Export-Import Bank of Korea (Korea Eximbank) para sa loan sa amo nga proyekto.
Ginpahayag man ni Senator Drilon nga madamo ang nagahulat nga mga Ilonggo sa pagtukod sang taytay nga amo ang magkapamaayo pa sang pangabuhi kag palangabuhian sang mga pumuluyo.
Ginpaboran man ni Senate Finance Committee chairman Sonny Angara si Senator Drilon kag ginmanduan si Chua nga i-review ang proseso nga involved sa nasambit nga proyekto.
Ginsiguro naman ni Chua nga makigkita siya sa DPWH kag sa Department of Finance agud nga i-review ang timeline sang proyekto kag balikan ang panel kun may yara na siya sang kopya.
Pahayag ni Drilon, wala siya nagakulang sa pag-remind kag pag-follow up sang nasambit nga proyekto sa NEDA.
Umpisa pa lang sang pagpungko ni Mark Villar bilang tiglikom sang DPWH, suno sa senador, nagpasalig na si Villar nga matapos ang Panay-Guimaras Bridge apang nag-resign lang ini kag wala sa gihapon masugudan.
Dugang pa ni Drilon, indi niya mahangpan kun ngaa nagaka-delay ang nasambit nga proyekto apang mahimo posible bangud sa kakulang sa paghatag sang atensyon kag kakulang man sang suporta.
