Ginadiskusyunan na sang mga senador sa Majority bloc ang nangin pagpanghangkat sang Chinese Embassy sa mga opisyal sang Pilipinas nga ideklarar nga persona non grata si Chinese Ambassador Jing Quan.
Ini ang ginkumpirma mismo ni Senator JV Ejercito subong nga adlaw, Oktubre 18, kasunod sang nangin pahayag ni Quan nga wala sang ibato ang Pilipinas sa pwersa sang China.
May kaangtanan ini sa nagapadayun nga diskusyon sa West Philippine Sea, apisar sang 2016 arbitral award nga nagapabakod sang soverign rights sang pungsod sa exclusive economic zone sini kag sa continental shelf sa nasambit nga kadagatan.
Nagapati man si Ejercito nga dapat bayluhan sang China ang ila ambassador sa Pilipinas kun luyag sang mga ini nga mangin maayo ang ila relasyon sa pungsod ilabi na nga daw kaangay nga ginapalala lang ni Quan ang tensyon pinaagi sa iya mga pahayag.
Madumduman nga nagpaguwa man sang una nga pahayag ang senador agud pabalikon si Quan sa China nga naggamit pa sang Mandarin, apang ginpakamalaot naman ini sang Chinese Embassy.
Pahayag sang embahada, nagapakuno-kuno lang si Ejercito kag nagapinadayaw agud makakuha sang atensyon kag mangin kaundan sang balita.
