Mas padalman pa sang senado ang imbestigasyon sa operasyon sang Private Motor Vehicle Inspection Centers (PMVICs) sa tunga sang alegasyon sang iregularidad sa pagpatuman sang joint project sang Department of Transportation kag Land Transportation Office.
Sa interview sang Bombo Radyo kay Senate Minority Leader Franklin Drilon, iya ginpahayag nga apisar ginsuspend ni Presidente Rodrigo Duterte ang nasambit nga vehicle inspection scheme, nagakadapat nga masabat sa gihapon ang mga palamangkutanon nahanungod sa kon sin-o ang nagpili sa 23 ka mga kompaniya nga amo ang magapatigayon sang inspection apisar nga wala man sang natabo nga bidding.
Suno kay Drilon, nagalaum siya nga imbestigahan man sang Senate Blue Ribbon Committee kon may yara sang mga layi nga ginlapas agud paboran ang pila ka inspection centers.
Pahayag pa sang opposition senator, dapat nga ipasa man sang Land Transportation Office (LTO) sa senado ang official list sang PMVIC operators.
Suno sa iya, pondo sang pumuluyo ang ibayad sa private sector nga kuntani, ini nga serbisyo ang dapat himuon sang LTO kag ang bayad ang direkta nga magakadto sa gobyerno kag indi sa mga pribado nga kompaniya.
Ginapanan-aw nga P8-billion ang kitaon sang mga kompaniya kada tuig bangod sa sini nga vehicle inspection scheme.
