Indi pagpasugtan sang Senate ang pagbalik sang P45 billion nga ginkakas sa proposed 2026 budget sang Department of Public Works and Highways (DPWH).
Ini suno kay Senate Majority Floor Leader Juan Miguel Zubiri.
Ang amo nga amount ang pagagamiton kuntani para sa 10,000 projects sang DPWH, apang nagakontrahanay ang panindugan sang kamara kag senado sa diin ginainsister sang higher chamber ang amo nga budget cut.
Suno kay Zubiri nga suportado sini ang mga miyembro sang bicameral contingent sang senado, apang suno sa iya basi mahimo ini nga “pabaskuganay” kon ibalik ang bug-os nga pondo.
Suno pa sa iya nga mas maayo nga klaro kun diin nga proyekto ang mabuhinan ukon ibalik ang kwarta.
Ginpunto man sini nga ang DPWH kag si Presidente Ferdinand Marcos, Jr. mismo nagsiling nga may overpricing sa construction materials, gani indi nagakaigo nga ibalik ang bug-os nga pondo.
Ginkumpirmar man sini nga mahimo nga ma-delay ang budget process.
Apang gin-athag niya nga wala man sang malain kun may yara sang reenacted budget para sa 2026.
