ILOILO – Imbestigaran sang Senado ang ginapahayag lapnagon nga korapsyon sa Philippine Health Insurance Corporation (PhilHealth).
Ini ang kasunod sang resignation sang anti-fraud legal officer sang ahensya nga si Atty. Thorrsson Montes Keith bangud sa ginapahayag indi patas nga job promotion process, delayed nga sweldo kag hazard pay, kag unconstitutional nga mandu sa mga overseas Filipino workers nga magbayad sang PhilHealth contribution.
Sa interview sang Bombo Radyo kay Senator Francis ‘Kiko’ Pangilinan, iya ginpahayag nga ginahanda na subong ang resolution agud gilayon nga maumpisahan ang maid-id nga pagpangusisa.
Wala naman ginkakibot ni Pangilinan ang alegasyon sang nag-resign nga abogado bangud suno sa senador, madugay na ang amo nga isyu apang tubtob subong, wala sa gihapon sang may ginpreso ukon ginpasakaan sang kaso.
Ginpakamalaot man sang senador ang akto sang ahensya bangud amo kuntani ini ang ginalauman nga magabulig sa gobyerno ilabi na sa tion sang COVID-19 pandemic.
