Nagapati ang isa ka abogado nga pinasahi ang proseso sang reklamo nga impeachment nga atubangon ni Vice President Sara Duterte bangud natuon ini sa election period kag naka-adjourn na ang 19th Congress.
Sa interview sang Bombo Radyo kay Atty. Jeremy Moreno, law professor sa University of San Agustin College of Law, iya ginpahayag nga mahimo sa gihapon nga magserbe bilang impeachment court ang Senado apisar nga naka-adjourn ini ukon wala sang anuman nga regular session.
Suno kay Moreno, ang hearing sa impeachment complaint ang indi isa ka ordinaryo nga function sang Kongreso, sa baylo, ini ang isa ka non-legislative function kag special function.
Bangud sini, indi ‘applicable’ ang mga nakaandan nga proseso ukon pagsulundan nga sa tion nga naka-adjourn na ang Senado, wala na sang session nga matabo.
Nagapati ang natungdan nga indi mahimo pagpadugayon pa sang Senado ang impeachment complaint ilabi na nga gin-impeach na ang bise presidente sa Kamara.
Ginpahayag sini nga obligasyon sang Senado nga mag-hearing sa verified impeachment complaint, santo man sa nakasaad sa layi.
Nahimo na suno sa iya sang Kamara ang papel sini kag yara na sa Senado ang katungdanan agud padayunon ang impeachment process batok kay Duterte.
Una diri, ginpahayag ni Senate President Chiz Escudero nga indi magpatigayon sang impeachment trial ang Senado tubtob indi ini magre-reconvene sa Hunyo 2, 2025, bangud una na nga nag-adjourn ang Senado nga wala naistoryahan ang complaint.
