Nagahingyo ang Senado sang “full briefing” halin sa Department of Foreign Affairs (DFA) kaangot sa natabo nga agresibo nga pag-atake sang China Coast Guard (CCG) sa mga soldado nga Pinoy kadungan sang rotation and resupply mission sa Ayungin Shoal sang Hunyo 17.
Suno kay Senate President Francis Escudero, makaalarma na ini nga sitwasyon gani kinahanglan nga iplastar sang DFA kun ano na ang mga ginahimo agud nga maresolba ini.
“The escalation of tensions in the West Philippine Sea is alarming, and the Senate will be seeking a full briefing from the DFA on the latest incident, as well as the efforts being undertaken to address this,” statement ni Escudero.
Ginsulit man sang senate president ang panawagan sini nga magpatigayon sang dayalogo sa tunga sang Philippine kag Chinese officials agud malikawan nga magsaka ang tension sa rehiyon.
Dapat man suno sa iya nga indi lang filing sang diplomatic protests ang himuon sang ahensya sa kada may matabo nga insidente,
Nagpanawagan man ang senate president sa Armed Forces of the Philippines (AFP) nga magpangita sang alternatibo nga paagi nga makadul-ong sang suplay sa BRP Sierra Madre sa Ayungin Shoal.
Pahayag ni Escudero, ini nga tikang ang magapasiguro nga magapadayon ang pag-resupply samtang mahagan-hagan ang risgo sa tunga sang dagat kaangay sang natabo sang nagligad nga Lunes kun sa diin isa gid ka Philippine navy personnel ang nautdan sang tudlo samtang iban pa sa ila ang nasamaran.
