Nagdesisyon ang Senado nga i-archive ang impeachment complaint batok kay Bise Presidente Sara Duterte, kasunod sang desisyon sang Korte Suprema nga nagasiling nga unconstitutional ang articles of impeachment.
Ginkumpirmar ni Senate President Chiz Escudero sa plenary session nga 19 ka mga senador ang nagboto pabor sa pag-archive sang kaso, apat ang kontra, kag isa ang nag-abstain.
Sa mga nagboto pabor amo sanday Alan Peter Cayetano, Pia Cayetano, Bato dela Rosa, JV Ejercito, Chiz Escudero, Jinggoy Estrada, Win Gatchalian, Bong Go, Lito Lapid, Loren Legarda, Rodante Marcoleta, Imee Marcos, Robin Padilla, Erwin Tulfo, Raffy Tulfo, Joel Villanueva, Camille Villar, Mark Villar, kag Migz Zubiri.
Nagboto naman kontra sa mosyon sanday Bam Aquino, Risa Hontiveros, Kiko Pangilinan, kag Tito Sotto. Samtang si Ping Lacson ang nag-abstain.
Suno sa mga senador nga pabor sa pag-archive, ila ginarespeto ang desisyon sang Korte Suprema nga nagsiling nga wala sang hurisdiksyon ang Senado sa impeachment case, rason nga indi ini dapat ipadayunon.
Ang desisyon sang Senado ang nagapakita sang pagtahod sa legal nga proseso kag sa otoridad sang Korte Suprema bilang pinakamataas nga korte sa pungsod.
