Napaslawan ang Office of the Sergeant-at-Arms (OSAA) nga makit-an kag maaresto ang kontrobersyal kag suspendido nga alkalde sang Bamban, Tarlac nga si Alice Guo matapos nga gindagdagan ini sang Senado sang arrest order subong nga weekend.
Sa report nga ginpasa sang OSAA kay Senate President Francis Escudero, ginsiling nga sa bulig sang Philippine National Police lakip na ang Special Weapons and Tactics (SWAT) team, gintultol nila ang alkalde sa mga building kag estruktura sa QJJ Farm apang indi ini makit-an.
May ginpadala man nga teams sa garments factory sang Guo family sa Marilao, Bulacan kag sa Valenzuela City, apang wala man gihapon si Guo pati ang iya mga utod nga sanday Sheila, Seimen, kag Wesley.
Ang lamang naaresto kag nadala sa custodial facility sang Senado sa Pasay amo ang accountant ni Guo nga si Nancy Gamo nga amo ang gina-alegar nga in-charge sa mga dokumento sang Guo family.
Wala man sa iya rehistrado nga address si Dennis Cunanan, former executive sang Technology and Livelihood Resource Center (TLRC). Siya ang ginapahayag nga authorized representative sang iligal nga Philippine Offshore Gaming Operators (POGOs) sa Bamban kag Porac, Pampanga nga gin-raid anay kag ginpasirado sang mga otoridad.
Nahibaluan nga ang arrest orders kanday Guo kag sa mga myembro sang iya pamilya pati na kanday Gamo kag Cunanan ang nag-ugat sa ila pag-absent sa Senate hearings sang Hunyo 26 kag Hulyo 10.
Una na nga nagpahayag ang alkalde nga indi ini magtambong bangud sa anxiety kag trauma nga iya nabatyagan.
May arrest orders man nga gindagdag sa amay ni Guo nga si Jian Zhong Guo kag sa iloy sini nga si Wen Yi Lin apang nagbiya na sila sa pungsod.
Nahibaluan nga si Guo, ukon ang nagaguwa man nga Chinese national nga si Guo Hua Ping, ang naka-post pa kadungan sang iya ika-32 nga kaadlawan sang nagligad nga adlaw kun sa diin iya ginpahayag nga “everything is temporary”. Sa amo nga Facebook post, nagpasalamat man ini sa mga taga-Bamban nga padayon nga nagasuporta sa iya apisar sang mga isyu nga iya gina-atubang.
