Nagaplano ang Senado nga buhinan sang 15% tubtob 20% ang budget sang mga infrastructure projects sa idalom sang Department of Public Works and Highways (DPWH) bilang tikang batok sa ginaalegar nga overpriced infrastructure projects.
Suno kay Senate President Vicente “Tito” Sotto III, ini nga plano ang na-diskusyonan na nila ni Senate Finance Committee Chair Sherwin Gatchalian.
Ang nasambit nga proposal ang nagguwa kasunod sang mga nabuyagyag nga anomaliya sa budget, partikular na ang ginahimo sang pila ka district engineers kag opisyal sang DPWH agud mabayran ang mga nagaproponer sang proyekto.
Ginpakamalaot man ni Gatchalian ang natukiban nga P10.3 billion nga balor sang mga overpriced farm-to-market road projects halin pa sang 2023 tubtob 2024 base sa budget deliberations sang Department of Agriculture.
Nagpatawag man sang imbestigasyon si Sotto angot sa mga super health centers, kun sa diin nahibaluan nga may 300 sa sini ang non-operational tubtob subong.
Ginpahayag ni Sotto nga posible nga ang committee report angot sa mga maanomaliya nga flood control projects ipasa sa Department of Justice (DOJ), Independent Commission for Infrastructure (ICI), kag sa Office of the Ombudsman para sa angay nga legal nga tikang.
Nahibaluan nga nakigkita si Sotto kay Senate Blue Ribbon Committee acting chair Erwin Tulfo agud istoryahan ang direksyon sang imbestigasyon.
Ginsiling pa niya nga posible makumbinsi sang majority block si Senator Panfilo “Ping” Lacson nga magbalik bilang committee chair.
