Ginpanugyan sang isa ka Bombo abogado nga indi epektibo kag wala sang binding power ang resolusyon sang Senado nga nagapangabay sa International Criminal Court (ICC) nga ipaidalum sa house arrest si former President Rodrigo Roa Duterte.
Sa interview sang Bombo Radyo kay Atty. Jobert Pahilga, isa ka human rights lawyer, ginpahayag niya nga may katungdanan ang Senado nga ipahayag ang ila balatyagon paagi sa resolusyon, apang ginpahayag man niya nga ini nga resolusyon makaimpluwensya sa ICC nga ibutang sa house arrest si Duterte.
Suno sa iya, ang ICC isa ka independent nga institusyon kag wala ini ginakontrol sang bisan ano nga gobyerno.
Ginpunto pa ni Atty. Pahilga nga kun ang ICC magpasugot sa mga resolusyon nga pareho sini, mahimo ini magbukas sang dalan sa pag-apekto sang desisyon sang iban pa nga mga institusyon ukon mga gobyerno.
Dugang pa niya, wala sang relevance ang sulod sang resolusyon sa kaso, bangud bisan pa nga ginahambal didto nga ipaidalum si Duterte sa physical, mental, kag psychological examination, wala sang klaro kun sa diin siya ipaidalum sa house arrest, kun bala diri sa Pilipinas ukon sa iban nga pungsod.
Ginpahayag man ni Atty. Pahilga nga may ara pa nga pending motion halin sa kampo sang depensa nga nagapangayo sang interim release para kay Duterte, kag wala sang epekto ang resolusyon sang Senado sa proseso sang ICC.
Matandaan nga ginapangatubang ni Duterte ang kaso sa ICC nga may kahilabtanan sa crime against humanity.
Madumduman man nga sang Marso 17, 2019, opisyal nga nagwithdraw ang Pilipinas sa ICC kag sa Rome Statute, matapos nga nagsumiter sang notisya sa United Nations sang Marso 16, 2018, suno sa anunsyo ni former President Rodigo Roa Duterte.
(Interviewed by Bombo Donnie Degala/Bombohanay Bigtime)
