Gin-aprubahan na sang Senado ang proposed 2025 national budget nga nagabalor sang P6.352 trillion.
May yara ini sang nakuha nga 18 nga boto nga nagpabor, wala sang nagpamatok, kag isa ang nag-abstain.
Una diri, ginsertipikahan ni Presidente Ferdinand Marcos Jr. ang 2025 budget bilang urgent gani ginpasar na sang Senado ini sa ikaduha kag ikatlo nga reading sa sulod lang sang isa ka adlaw.
Ginpaathag naman ni Senate Minority Leader Aquilino Pimentel III ang pag-abstain niya bangud inid ini kumporme sa desisyon sang kaangay niya nga mga senador.
Dugang niya, kinahanglan anay nga may yara sang emergency antes ang pagsertipika sang president bilang urgent ang hagna.
Samtang ang pareho sini nga minority senator nga si Senator Risa Hontiveros ang nagpaathag sa pagpabor sa pagpasar sang budget.
Suno sa iya, nadugangan ang budgets para sa Inter-Agency Council against Trafficking kag National Coordination Center Against Online Sexual Abuse and Exploitation of Children and Child Abuse and Exploitation Materials.
Ginkakas man sang Senado ang P39.8 bilyon nga alokasyon para sa Department of Social Welfare and Development nga Ayuda para sa Kapos ang Kita Program (AKAP) kag ginlakip na lang sa Assistance to Individuals in Crisis Situation (AICS) program.
Nadugangan naman ang budget sang Philippine National Police para makapatindog sang 54 nga police station sa mga local government units.
Samtang, ginpabilin man sang Senado ang P733 million budget para sa Office of the Vice President nga amo man ang ginpropose sa bersyon sang House of Representatives.
Suno kay Senator Grace Poe nga amo ang chairperson sang Senate finance committee, itugyan na lang sa mga members sang bicameral conference committee (bicam) ang desisyon kun dugangan kon buhinan pa gid ang 2025 budget para sa OVP kag ang Ayuda para sa Kapos and Kita Program (AKAP) sang Department of Social Welfare and Development.
