Posible nga tapuson na sang Senado subong nga semana ang hearings kay dismissed Bamban, Tarlac Mayor Alice Guo kag ginaalegar kaangtanan sini sa illegal nga Philippine offshore gaming operators (POGO) activities sa pungsod.
Suno kay Senate Pro Tempore Jinggoy Estrada, posible nga amo na ini ang katapusan nga hearing bangud wala naman sang mapuga nga impormasyon sa anay alkalde.
Gin-ako ni Estrada nga wala sila nanamian bangud wala gid sang may nakuha nga sabat kay Guo apisar malapit apat ka bulan ang imbestigasyon sang Senate Committee on Women, Children, Family Relations and Gender Equality.
Bisan indi incriminating ang mga pamangkot sang mga senador suno sa iya, wala man sila sang mahimo bangud gina-sulit-sulit ni Guo nga gina-invoke sini ang iya kinamatarong batok sa self-incrimination, kag indi na siya maghambal bangud may mga kaso na nga na-file batok sa iya sa korte.
Septyembre 9 sang katapusan nga nagtambong si Guo sa hearing sang Senate panel nga sa ikaduha nga tion, gindagdagan siya sang contempt order bangud sa pagbinutig kag pagpamalibad nga magsabat.
Kahapon, Septyembre 23, sang ginsaylo si Guo sa Pasig City Jail female dormitory.
Ginkumpirma man sang Bureau of Jail Management and Penology (BJMP) nga nag-negatibo ini sa test sa tuberculosis.
Ginpakita man sang jail bureau ang resulta sang iya sputum ukon saliva test matapos nagguwa ang initial report nga may infection sa wala nga baga ang dismissed mayor.
Nahibaluan nga ang pagsaylo kay Guo sa Pasig ang kasunod sa mandu sang Pasig City Regional Trial Court (RTC) Branch 167 sang September 19. Kasunod ini sang non-bailable trafficking in persons case nga gin-file sang Presidential Anti-Organized Crime Commission kag PNP Criminal Investigation and Detection Group sang nagligad nga Hunyo nga napaidalom sa hurisdiksyon sang korte sa amo nga syudad.
