Makabulig ang National Bureau of Investigation kag Bureau of Immigration agud matukiban ang mga opisyal sang korporasyon nga ginaalegar nagbaton sang binilyon nga balor sang kontrata sang Department of Budget and Management (DBM) para sa pagbakal sang face masks kag RT-PCR test kits sang nagligad tuig.
Suno kay Senator Minority Leader Franklin Drilon, pangitaon liwat ang mga opisyal sang Pharmally Pharmaceutical Corporation ukon ang departure record bangud mahimo nga nagbiya na ang mga ini sa ila tagsa ka mga lugar.
Matandaan nga ang nasambit nga pharmaceutical company ang nagdaog sang P8.6 billion sa government contracts para sa pagbakal sang face masks kag RT-PCR test kit sang nagligad tuig.
Gintinguhaan sang Senado nga serbehan sang subpoena ang Pharmally officials
nga naga-istar sa high-end condominium sa Taguig apang suno sa security staff, ang mga units nga nakasaad sa general information sheet sang kompaniya ang bakante humalin sang 2018.
Nagpanawagan ang senador sa mga opisyal sang amo nga kompaniya nga boluntaryo nga magpakita sa Senado kag ipaathag man ang ila nga bahin.
Una na nga ginpahayag ni Christopher Lloyd Lao, former chief of the procurement service sang DBM, nga sa idalom sang iya liderato sang nagligad tuig, napaslawan siya nga i-check ang mga articles of incorporation sang nasambit nga kompaniya.
Ginrekomenda man ni Senator Drilon sa Blue Ribbon Committee ang pag-file sang anti-graft charges batuk kay Lao.
Natalana ang masunod nga hearing sa Septyembre 7.
