ILOILO CITY- Ginbali ni Sen. Aquilino “Koko” Pimentel III ang pahayag nga politically motivated ang ginaduso nga Senate investigation sa estate tax liabilities sang pamilya Marcos.
Suno sa senador, ‘in aid of legislation’ ang imbestigasyon kag isa ini ka national interest bangud makapulos ang publiko sa P203 billion estate tax liabilities sang mga Marcos.
Pahayag ni Pimentel, kuntani ginbayaran na sang mga Marcos ang estate tax nga gindesisyunan sang Supreme Court sang 1999 nga yara lang sa P23 billion apang ginpabay-an lang ini sang mga Marcos gani naglab-ot sa P203 billion bangud sa interest, charges kag surcharges.
Ginaduso man niya nga ipatawag sa Senate hearing ang mga former kag current BIR officials kag administrators sang Marcos estate.
Luyag man niya padalman ang kahuyang sa tax laws sa National Internal Revenue Code kag kun ngaa wala nasukot sang BIR ang amo nga amount apisar nga may yara na sang final decision.
Si Pimentel ang anak ni anay Senate President Aquilino “Nene” Pimentel Jr. nga gin-aresto sang pila ka beses sa idalom sang Marcos dictatorship kag amo man ang co-founder sang PDP-Laban agud kontrahon ang diktador.
