ILOILO CITY – Pirma na lang ni Presidente Rodrigo Duterte ang ginahulat sa pagpa-iway sang May 2020 local and national elections.
Sa interview sang Bombo Radyo kay Senate Majority Leader Juan Miguel Zubiri, iya ginpahayag nga pat-od na nga indi madayon ang pinili-ay sa masunod nga tuig.
Suno kay Zubiri, pabor ini para sa incumbent officials apang indi naman ini pabor para sa mga may tuyo nga magkandidato sa eleksyon.
Ginpahayag ni Zubiri nga sa baylo nga sa May 2020, patigayunon ang eleksyon sa una nga Lunes nga adlaw sang Disyembre 2022.
Suportado ni Zubiri ang pagpatukod sang Iloilo-Guimaras bridge agud nga indi na masulit ang Iloilo Strait tragedy.
Ginaduso man ni Zubiri nga dapat madayon ang pagpatukod sang taytay halin sa Guimaras padulong sa Negros Island agud nga mapahapos ang pagbiyahe sang mga pasahero kag amo man ang pag-transport sa mga produkto.
Ginpahayag ni Zubiri nga ginasuportahan niya si Senate Minority Leader Franklin Drilon nga amo ang nagduso sa nasambit nga proyekto.
Kun tuhoy naman sa pagtunga sa syudad sang Iloilo sa duha ka distrito, pabor man diri ang Senate Majority Leader.
Suno sa senador, tuman ka lapad ang syudad sang Iloilo kag madamu ang populasyon.
Naghatag man sang halimbawa ang natungdan sa diin ang iban nga mga syudad sa pungsod nga mas magamay ipaanggid sa Iloilo City ang natunga naman sa pila ka distrito.
Kun matunga sa duha ka distrito ang syudad sang Iloilo suno kay Zubiri, magadoble ang resources kasubong sang pondo nga igahatag Local Government Unit.
