ILOILO – Suportado ni Senate Majority Leader Francis Tolentino ang panawagan ni Senate President Chiz Escudero nga suspendihon ang implementasyon sang Public Utility Vehicle Modernization Program (PUVMP) sa Pilipinas.
Sa interview sang Bombo Radyo kay Tolentino, iya ginpahayag nga 2017 sang nag-umpisa ang Public Utility Vehicle Modernization Program sa pungsod kag para sa iya, kinahanglan nga padalman anay agud nga mangin epektibo sa mga operators kag drivers.
Suno kay Tolentino, mas mayo nga i-review anay ang programa bangud madamo sang problema ang nagtuluhaw kag isa na diri amo ang mapilitan nga mabakal ang mga kooperatiba sang mga modernized jeepney apisar nga kulang ang ila nga pondo.
Ginpahayag man sini nga tuman ka kulang ang subsidy nga ginahatag sang gobyerno sa tagsa ka kooperatiba rason man nga mapilitan sila nga mag-loan.
Gin-athag man sini nga kinahanglan nga balasenhon kag tun-an anay ang programa kon masarangan sang pungsod ang moderinisasyon.
Naghatag man ini sang suhestyon nga indi pagpabudlayan ang mga drivers kag operators kon indi lang man ini masarangan sang gobyerno nga mahatagan sang subsidiya.
Nagapati man ang senador nga naga-eksister ang problema bangud sa bureaucratic initiative nga nagresulta man sa bureaucratic decision.
