ILOILO CITY – Ginpakamalaot ni Senate Minority Leader Aquilino “Koko” Pimentel III ang Marcos administration bangud sa P9.2 billion confidential and intelligence funds nga suno sa iya, wala sang pag-ulikid sa matuod nga problema sang mga ordinaryo nga Pilipino.
Una na nga ginkumpirma ni Budget Secretary Amenah Pangandaman nga may yara sang P120 million nga dugang sa intelligence kag confidential funds sang gobyerno bangud sa gin-request sang Department of Information and Communications Technology, Presidential Security Guard, kag sang Anti-Money Laundering Council.
Apang, ginkwestiyon ni Pimentel ang mga prayoridad sang ginaduso nga P5.768-trillion National Expenditure Program ni President Ferdinand Marcos, Jr.
Suno sa iya, ang allocation sang intelligence kag confidential funds sa budget ang isa ka dako nga sala.
Nagapabaskog lamang ini suno sa iya sang gintalakay niya sa iya contra State of the Nation Address nga napaslawan ang gobyerno nga intindihon ang sitwasyon sa household level.
Gindugang pa niya ang dako nga epekto sang nag-agi nga mga bagyo sa mga lugar sa Northern Luzon nga nagapabilin sa gihapon nga ginabaha tubtob subong.
Ang confidential kag intelligence funds suno sa iya ang mahimo pa nga magamit sa relief kag rehabilitation efforts sa mga apektado nga lugar.
Sang nagligad nga semana, gindepensahan ni Pangandaman ang confidential and intelligence funds nga suno sa iya, naganubo kun ikumpara sang nagligad nga mga tuig.
Base sa ginaduso nga National Expenditure Program sa masunod nga tuig, ang intelligence funds ang nagdangat sa P5.77 billion.
Sang 2023, yara lamang ini sa P5.217 billion, kag P6.405 billion sang 2022.
Samtang, ang confidential funds nga ginaduso sa 2024 ang nagdangat sa P4.864 billion nga mas mataas kun ikumpara sa P4.804 billion sang 2023 kag P3.864 billion sang 2022.
