ILOILO CITY – Gin-contempt sang Senate committee on public order and dangerous drugs ang isa ka police officer nga gina-alegar nagpamalibad sa pagbaton sang blotter report sang isa ka political killing victim sa Negros Oriental nga si Juwim Estinoso, nga kaalyado sang ginpatay nga si Governor Roel Degamo.
Si Senator Jinggoy Estrada ang nagduso nga i-contempt si PSSG. Renevic Rizaldo, desk officer sang Bawayan, Negros Oriental police matapos nga makapila niya ka beses nga ginpanginwala nga ginbalewala niya ang report ni Estinoso may kaangtanan sa pamahog sa iya kabuhi.
Suno kay Rizaldo, indi na niya madumduman nga nagpadulong sa iya si Estinoso agud nga mag-report sang iya sitwasyon bangud nga madamo sang nagapadulong sa ila istasyon.
Ang motion ni Estrada ang ginsuportahan ni Senator Ramon “Bong” Revilla Jr.
Suno kay Revilla, ang loyalty ni Rizaldo ang wala sa pulisya kundi, sa iya nga amo.
Si Rizaldo ang anay security personnel ni suspended Negros Oriental Representative Arnolfo “Arnie” Teves Jr., nga gina-angut man sa political killings sa probinsya, lakip na sa kay Degamo.
Gin-aprubahan naman ni panel chairman Senator Ronald “Bato” dela Rosa, ang motion kag ginmandu ang pag-detain kay Rizaldo sa sulod sang Senado.
Ang amay ni Juwim nga si Wilfred Estinoso ang nagtambong sa Senate investigation sa kamatayon ni Degamo kag nagpakigbahin nga nagpadulong ang iya anak sa police station agud nga magpa-blotter sa pamahog nga iya nabaton.
Apang, ginpahayag ni Rizaldo nga nagadalamguhanon lamang si Juwim.
Si Juwim ang ginpatay sang November 7, 2022.
