𝗠𝗔𝗡𝗜𝗟𝗔 —Ginpahayag ni Senate President Francis Escudero nga kustodiyahon sang National Bureau of Investigation ukon NBI si Sheila Guo, utod ni anay Bamban nga si Tarlac Mayor Alice Guo. kag Cassandra Li Ong, ang authorized representative sang gin-raid nga iligal nga Pogo hub sa Porac, Pampanga.
Ini kasunod sang pag-abot sa pungsod nanday Sheila kag Ong matapos gin-deport sa Indonesia sang Huwebes, Agosto 22, 2024.
Si Escudero nagsiling, nga ginpahibalo sila nga suno sa guidance halin sa Department of Justice (DOJ), ang National Bureau of Investigation magakuha sang kustodiya kanday Sheila kag Cassandra agud nga makapasaka sang mga kaso batok kay Cassandra kag para sa Bureau of Immigration (BI) nga magpatigayon sang mga inquest proceedings batok kay Sheila.
Dugang niya nga pagkatapos sini, i-debrief sila sang National Bureau of Investigation kag magakoordinar sila sa Senado kag sa Kamara nahanungod sa mga warrant nga gin-isyu batok sa ila.
Suno kay Escudero, ginmanduan niya si Senate Sergeant-at-Arms Roberto Ancan nga padayunon ang ila koordinasyon sa DOJ, NBI, BI, kag sa Philippine National Police para sa isa ka malinong nga pamaagi bangud sa legal nga kagamo nga nagapalibot sa duha ka personalidad.
Ang mag-utod nga Guo ang may yara sang standing arrest order nga gin-isyu sang Senate Committee on Women, Children, Family Relations, and Gender Equality nga sa karon naga-imbestigar sa gin-raid nga iligal nga Pogo hub sa Bamban, Tarlac.
Nasakop man sang mando ang ila amay nga si Jian Zhong Guo, ang ila ginaalegar iloy nga si Wenyi Lin, kag ang mag-utod nga sanday Siemen kag Wesley Guo.
Gin-isyu ang mandu kasunod sang ila pagpamalibad nga magkooperar sa committee probe sa illegal nga Pogo hub, sa diin gina-angot si Mayor Guo.
Nagpaguwa man sang subpoena ang panel sang Senado batuk kay Ong kag sa pila ka iban pa.
May yara man sang standing arrest order si Ong nga gin-isyu sang Kamara sa tunga sang ila imbestigasyon sa gin-raid nga iligal nga Pogo hub sa Porac, Pampanga.
Ginbuyagyag ni Senator Risa Hontiveros sang tinalikdan nga semana nga wala na sa Pilipinas ang mga Guo.
Nahibaluan nga na-intercept sanday Sheila kag Ong sa Indonesia.
