ILOILO CITY- Gintawag ni Senate President Francis “Chiz” Escudero nga makahuluya nga indi matultulan sang Philippine National Police (PNP) kag iban pa nga law enforcement agencies ang suspendido nga alkalde sang Bamban, Tarlac nga si Alice Guo para maserbehan sang arrest warrant.
Gnhikayan ni Escudero ang PNP bangud indi nila makit-an si Guo apisar nga ari lang ini sa pungsod base sa pahayag sang Bureau of Immigration.
Gintumod man ni Escudero ang iban pa nga akusado nga may kaso nga kriminal nga may yara man sang mga arrest warrant nga wala sa gihapon nadakpan sang mga otoridad.
Kalakip sa mga kilala nga personalidad nga may arrest warrant apang madanlog gihapon sa otoridad amo si anay Bureau of Corrections (BuCor) chief Gerald Bantag, nga nagapangatubang sa kaso nga pagpatay sa broadcaster nga si Percy Lapid kag inmate nga si Jun Villamor.
Ginapangita man kag may arrest warrant si Kingdom of Jesus Christ leader Apollo Quiboloy nga may nagkalain-lain nga kaso nga ginapangatubang kalakip na ang child abuse.
Sa pihak sini nga kapaslawan sang PNP kag NBI, ginpahayag ni Escudero nga indi niya pagrekomenda nga buhinan ang budget sang nasambit nga mga ahensiya.
