ILOILO CITY – Dako ang pagpati ni Senate President Juan Miguel Zubiri nga makalusot sa judicial scrutiny ang kontrobersyal nga Maharlika Investment Fund Act.
Ini ang sabat ni Zubiri kasunod sang pagmandu sang Supreme Court sa executive kag legislative branches sang gobyerno nga magpasa sang ila komento sa petition nga nagatuyo nga ideklarar nga unconstitutional ang Maharlika Investment Fund Act of 2023.
Suno kay Zubiri, gina-welcome nila ang amo nga mandu sang high court kag dako ang iya pagpati nga ideklarar nga constitutional ang amo nga layi.
Pahayag pa niya, ginrespeto niya upod sa iban nga senador ang anuman nga tikang agud nga dal-on sa Supreme Court ang kontrobersyal nga layi.
Ginmanduan naman niya ang Senate Secretary nga magpakig-angut sa Office of the Solicitor General may kaangtanan sa paghanda kag pagpasa sang komento.
Nakahanda man sila suno sa iya nga magsabat sa anuman nga palamangkutanon kag issues may kaangtanan sa Maharlika Investment Fund Act of 2023.
Dugang pa niya, respetuhon nila ang mangin desisyon sang Supreme Court may kaangtanan sa nasambit nga butang.
Kung madumduman, sang Setyembre, nag-file sang petition sa Supreme Court sanday Senate Minority Leader Aquilino “Koko” Pimentel III, tatlo ka anay Bayan Muna party-list lawmakers nga sanday Neri Colmenares, Ferdinand Gaite, kag Carlos Zarate bangud sang gina-alegar pagdali-dali sa approval sang Maharlika Investment Fund bill.
