ILOILO CITY – Gintalana na sang Senado sa masunod nga semana ang imbestigasyon kaangot sa secret jail nga natukiban sa police station sa Tondo kadungan sang inspeksyon nga ginpatigayon sang Commission on Human Rights (CHR).
Sa interview sang Bombo Radyo Iloilo, ginpahayag ni Sen. Bam Aquino nga amo ang nagduso sang resolusyon para imbestigaran ang isyu, naghatag na sang commitment si Sen. Panfilo Lacson nga pinuno sang Senate Committee on Public Order and Dangerous Drugs.
Ginpasiguro ni Lacson suno kay Sen. Aquino, nga sa masunod nga semana, suguran na ang Senate hearings.
Ginlaslasan naman sang senador ang pamunuan sang PNP apisar wala direkta nga gintumod si PNP chief Police Director General Ronald dela Rosa, sa pagdepensa sang mga pulis nga may kahilabtanan sa sikreto nga presuhan.
Maathag suno kay Sen. Aquino nga paglapas sa Konstitusyon kag tawhanon nga kinamatarong ang ginhimo sang mga pulis.
Kaangay lang suno sa senador nga gin-absuwelto sang pamunuan sang PNP ang mga pulis.