Ginsita ni Senate Minority Leader Franklin Drilon ang P9.6 bilyon nga pondo sang Armed Forces of the Philippines (AFP) nga nagakatulog lang sa Philippine International Trading Corporation (PITC).
Sa budget deliberation sang Department of National Defense (DND), ginpamangkot ni Drilon si Senator Panfilo Lacson, nga amo ang nagdepensa sa budget sang DND, kun pila ang balor sang kontrata sang militar sa PITC.
Suno kay Lacson, kapin P9.623 billion na ang kontrata.
Sa nasambit nga balor, P6.3 billion ang halin sa Philippine Army, P736 million sa Philippine Air Force, P1.99 billion sa Philippine Navy kag P582 million sa Armed Forces of the Philippines General Headquarters.
Ginbusisi ni Drilon kun sa nasambit nga sistema naguwa ang financial records sang AFP nga obligated ang pondo ukon nagamit sang militar.
Sang ginkumpirma ini ni Lacson ginpahayag ni Drilon nga misleading ang obligation rate sang AFP bangud ginakabig nga nagamit na ang pondo bisan ginhalin ukon nakatinir lang sa PITC.
Suno naman kay Senator Imee Marcos, style na sang mga ahensya sang gobyerno nga isaylo ang pondo sa isa ka ahensya agud indi na mabalik pa sa national treasury.
Pahayag ni Marcos, ang Department of Information and Communication Technology ang may P1.5 billion nga parked funds sa Bases Conversion and Development Authority (BCDA).
Bangud sini, magapasa si Drilon sang resolusyon para maimbestigahan ang mga kwestyonable nga tikang sang iban nga ahensya sang gobyerno.
