ILOILO CITY – Indi mangin mahapos para sa Duterte administration ang pagpatuman sang war on drugs campaign bangud nga mismo ang mga katapo sang law enforcement agency ang naangot sa illegal drugs.
Ini ang nangin pahayag ni Senate Minority Leader Franklin Drilon matapos ang pagbuyagyag ni Philippine Drug Enforcement Agency Director General Aaron Aquino nga gina recyle ang illegal drugs nga nakuha sa buy bust operation agud nga makwartahan.
Sa interview sang Bombo Radyo kay Drilon, iya ginpahayag nga tuman siya nga nadismaya tuhoy sa ginbuyagyag ni Aquino.
Suno kay Drilon, imposible nga mauntat ang pagduging sang illegal drugs sa pungsod bangud nga ang mga otoridad mismo ang nagalapas sa ginapatuman nga war on drugs campaign.
Ginpahayag ni Drilon nga wala ginasunod sang otoridad ang pagsulundan tuhoy sa husto nga disposal sang illegal drugs.
Nahibaluan nga masobra na sa P22 billion nga balor sang illegal drugs nga yara sa inventory sang Philippine Drug Enforcement Agency ang wala pa na dispose.
May kaangtanan naman sa nagapadayon nga illegal drug transaction sa sulod sang New Bilibid Prison, ginpahayag sang senador nga hatagan sang pondo ang Philippine Drug Enforcement Agency para makapahamtang sang satellite office sa sulod sang jail facility agud nga matapna ang nasambit nga buluhaton.
