Wala sang maayo nga epekto sa ekonomiya sang Pilipinas ilabi na gid sa mga mamumugon sang Pilipinas ang industriya sang Philippine offshore gaming operations ukon POGO.
Ini ang ginpanindugan ni Ilonggo Senator Franklin Drilon.
Sa interview sang Bombo Radyo kay Senator Franklin Drilon, iya ginpahayag nga wala sang maayo nga madala ang POGO sa pilipinas kag lunsay mga tsino lang ang naga benepisyo sa operasyon sini.
Suno kay Drilon, indi sya pabor sa pagbukas sang mga operasyon sang nasambit nga industriya bangud ilegal kag wala sang working permits ang mga tsino nga naga ubra sa mga POGO.
Dugang pa sang natungdan, suportado niya ang konklusyon ni Department of National Defense Secretary Delfin Lorenzana nga ginagamit sang China ang mga POGO nga nakahamtang malapit sa mga military camps agud mag espiya diri nga isa ka seryoso nga katalagman sa pungsod.
Samtang ginpahayag naman ni 5th District Congressman kag Chairman sang committee on National Defense and Security sa House of Representative Raul “Buboy” Tupas nga may yara sila sang rekomendasyon may kaangtanan sa naga sulod nga industriya sang POGO sa pungsod.
Suno sa kongresista, dapat may yara sang gintalana nga mga lugar para lang sa mga POGO hubs kun sa diin malayo ini sa military camps, eskwelahan kag iban.
Ikaduha, nagakadapat nga mas hugton sang pungsod ang layi may kaangtanan sa mga naga sulod nga foreign businesses sa Pilipinas.
Kag ika tatlo amo ang pag limita sang maximum permissible period sa mga naga sulod nga turista sa pungsod, gilayon nga ibutang sa blocklist ang mga naga overstay kag hatagan sang sanction ang wala nagasunod sa mga pagsulundan.
