ILOILO CITY – Suportado ni Ilonggo Senator Franklin Drilon ang pagpahalin ni Presidente Rodrigo Duterte kay Bureau of Corrections director general Nicanor Faeldon bangud sa pagpaguwa sa convicted criminals may kaangtanan sa Good Conduct Time Allowance.
Sa exclusive interview sang Bombo Radyo kay Drilon, Senate Minority Leader, iya ginpahayag nga nagapati siya nga matuod ang mga akusasyon batok kay Faeldon.
Suno kay Drilon, wala na sang iban pa nga mas maayo nga solusyon kundi ang pahalinon sa pwesto si Faeldon nga nangin kontrobersiyal man sadto sa Bureau of Customs.
Ginpahayag ni Drilon nga mabudlay para sa iya nga magpati sa pahayag ni Faeldon bangud madamo sang makabig loophole ukon sala.
Dako naman ang nangin bulig sang ginpatigayon nga hearing sa senado sang gintalikdan nga Setyembre 2 tuhoy sa nasambit nga isyu.
Samtang, wala naman nagapati ang Ilonggo Senator nga naangot sa kurapsyon sa Bureau of Corrections si Senator Ronald “Bato” Dela Rosa nga sadto anay pinuno sang nasambit nga ahensya sang gobyerno.
Sa pagpaathag ni Drilon, personal niya nga kilala si Dela Rosa kag siya mismo ang makapamatuod nga wala sang kaangtanan sa kurapsyon ang anay BuCor chief.
