Ginkilala ni Senator Win Gatchalian ang Iloilo bilang modelo sa lokal kag partisipatibo sa pagdumala sang edukasyon, matapos niya obserbahan ang “Proof of Concept” ukon POC sang Devolution of Basic Education initiative sa probinsya.
Si Gatchalian, nga Co-Chair sang Second Congressional Commission on Education ukon EDCOM II, ang guest of honor sa education forum sang Hulyo 8 sa Iloilo City, ginpatigayon sang Synergeia Foundation upod ang Education Core Group sang probinsya.
Suno sa senador, Iloilo lang ang probinsya sa pungsod nga may inisyatibo nga ginalakipan sang mga alkalde bilang aktibo nga kabahin sang education reform. Ang POC ginpatuman sa pila ka pilot municipalities, lakip ang Igbaras, Guimbal, Leganes, Pavia, Maasin, kag iban pa, nga may tuyo nga mapaayo ang pagbasa sang Grade 3 learners paagi sa localized strategies.
Base sa datos ni Board Member Jason Gonzales, nagtaas ang average reading scores sang mga estudyante halin sa pre-test pakadto sa post-test. Ginasuportahan ni Gatchalian nga mahimo ini nga modelo para sa bug-os nga pungsod, kag posible man nga magagikan sang legislasyon agud pormal nga ipasulod ang papel sang local chief executives sa edukasyon.
