ILOILO CITY – Ginakonsiderar ni Senator Jinggoy Estrada nga iduso ang pag-ban sang Korean telenovelas sa pungsod.
Ini agud nga makahatag sang ligwa para ma-promote ang Filipino-made shows.
Sa ginpatigayon nga hearing sa proposed 2023 budget sang Film Development Council of the Philippines, ginpahayag sang senador nga sa iya obserbasyon, sa padayon nga pagpagwa sang Korean telenovela, mas gina-idolo sang mga Pilipino ang mga Koreano kag nagakadulaan na sang trabaho ang mga local artists.
Dugang pa niya, sa baylo nga gina-promote ang kaugalingon nga produkto, mas gina-promote pa sang Pilipino ang mga produkto sang mga foreigners.
Sa amo man nga hearing, ginpahayag ni Senator Robin Padilla nga pasakaan ang buwis sa foreign series agud nga mabuligan ang local film industry.
Suno sa iya, kun may yara sang rice tarrification, may yara man dapat sang foreign teleserye tariffication.
Dugang pa niya, mabudlay nga i-ban ang Korean drama sa pungsod apang dapat nga mangin patas bangud nga makaluluoy na ang amo nga industriya sa Pilipinas.
Ginpahayag naman ni Film Development Council of the Philippines Chairman Tirso Cruz III nga dapat nga may yara sang balance agud nga ma-promote kag mahatagan sang proteksyon ang mga local films.
Ini na subong ang ginatuktukan sang ahensya.
Nagpangayo man ini sang dugang nga budget agud nga makapatukod sang kaugalingon nga building ang ahensya.
Suno sa iya, ang ahensya ang nagabayad subong sang P6 million sa tagsa ka tuig para lang sa renta sang building kun sa diin diri nahamtang ang 44,221 elements nga ginbilin sa ahensya para sa safekeeping kag restoration.
Nagakahangawa man ini bangud nga ang mga films ang mahimo maguba bangud sang pagbaha nga ila naeksperyensyahan sa amo nga building.
Nagpangayo naman sang kopya si Senator Mark Villar sang request para sa bag-o nga building.
