Ginpa-Bombo sang isa ka senior citizen ang pulis nga nangtaya sang pusil sa iya.
Ang tagreklamo amo si Eduardo Comuelo, 81, nga nagaistar sa Población, Sta. Barbara, Iloilo.
Ang ginareklamo naman ang ginapahayag nga isa ka police major nga assigned sa Maritime Unit 6.
Sa interview sang Bombo Radyo kay Eduardo Comuelo, iya ginpahayag nga natabo ang insidente sa Balibagan Este sa amo nga banwa.
Suno kay Comuelo, samtang naga-drive ini sang iya salakyan sakay man ang iya asawa, aksidente nga na-sideswipe sang side mirror sini ang side mirror man sang naka-park nga salakyan nga ginapanag-iyahan sang pulis.
Pahayag niya, didto na kag ginlagas ini sang pulis rason nga nagpondo ini kag sang ginkompronta sang pulis nga may ginakungkong pa nga duha ka tuig nga bata, didto na ini gintayaan sang armas sang police major.
Matapos ang pagbaisay, ginsiling sang pulis nga magakitaay na lang sila sa police station rason nga nagsunod man ang mag-asawa.
Pag-abot sa police station sang banwa, tuman ang pagkadismaya sang mga ini nga daw wala sang gana ang kapulisan nga mag-akomodar sa ila reklamo bangud nga myembro man sang Philippine National Police ang ila ginareklamo.
Suno kay Comuelo, ini ang rason kun nga gindangop na lang nila ini sa National Police Commission agud mag-file sang nagakaigo nga panumbungon batok sa ginapahayag nga police major.
